എന്താണ് ജീത്തു ജോസഫ് ഒരുക്കിവെച്ചിരിക്കുന്നത്?; ഫഹദിനൊപ്പമുള്ള സിനിമയുടെ അപ്‌ഡേറ്റുമായി സംവിധായകൻ

ഫഹദിനെ നായകനാക്കി പുതിയ സിനിമ ജീത്തു ജോസഫ് നേരത്തെ പ്രഖ്യാപിച്ചിരുന്നു. മോഹൻലാൽ ചിത്രം നേരിന് തിരക്കഥ ഒരുക്കിയ ശാന്തി മായാ​ദേവി തന്നെയാണ് ഈ സിനിമയും എഴുതിയിരിക്കുന്നത്. ഇ ഫോർ എന്റർടെയ്ൻമെൻസ് ആണ് സിനിമയുടെ നിർമാണം. ഇപ്പോഴിതാ സിനിമയെക്കുറിച്ചുള്ള കൂടുതൽ അപ്‌ഡേറ്റുമായി എത്തിയിരിക്കുകയാണ് ജീത്തു ജോസഫ്.

ദൃശ്യം 3 പൂർത്തിയായതിന് ശേഷം ഡിസംബറിലോ ജനുവരിയിലോ താൻ ഫഹദ് ഫാസിലിനൊപ്പമുള്ള ചിത്രം ആരംഭിക്കുമെന്ന് ജീത്തു ജോസഫ് പറഞ്ഞു. ആലപ്പുഴയാണ് സിനിമയുടെ പ്രധാന ലൊക്കേഷൻ. ആസിഫ് അലി നായകനായി എത്തുന്ന മിറാഷ് ആണ് ഇനി പുറത്തിറങ്ങാനുള്ള ജിത്തു ജോസഫ് ചിത്രം. സിനിമ സെപ്റ്റംബര്‍ 19ന് വേള്‍ഡ് വൈഡ് റിലീസിനൊരുങ്ങുകയാണ്. മികച്ച പ്രേക്ഷക - നിരൂപക പ്രശംസ നേടിയ 'കിഷ്‌കിന്ധാ കാണ്ഡ'ത്തിന് ശേഷം ആസിഫ് അലിയും അപര്‍ണ ബാലമുരളിയും വീണ്ടും ഒന്നിക്കുന്ന ചിത്രത്തിന്റെ ടീസര്‍ അടുത്തിടെ പുറത്തിറങ്ങിയിരുന്നു. ഇമോഷണല്‍ രംഗങ്ങളിലൂടേയും ത്രില്ലടിപ്പിക്കുന്ന നിമിഷങ്ങളിലൂടേയും നീങ്ങുന്ന ചിത്രമെന്ന് അടിവരയിടുന്നതായിരുന്നു ടീസര്‍.

അതേസമയം, മലയാളികൾ ഏറെ ആകാംഷയോടെ കാത്തിരിക്കുന്ന ദൃശ്യം 3 അടുത്ത മാസം ചിത്രീകരണം ആരംഭിക്കും. ജോർജ്കുട്ടി എന്ന കഥാപാത്രത്തിന് നാല് വർഷത്തിന് ശേഷമുണ്ടാകുന്ന മാറ്റങ്ങളെ ആണ് മൂന്നാം ഭാഗത്തിൽ കൊണ്ടുവരുന്നതെന്ന് ജീത്തു ജോസഫ് പറഞ്ഞു. ആദ്യ രണ്ട് ഭാഗങ്ങളെപ്പോലെ ഒരു ഹെവി ഇന്റലിജെന്റ് സിനിമയല്ല മൂന്നാം ഭാഗമെന്നും ജീത്തു ജോസഫ് ഒരു അഭിമുഖത്തിൽ പറഞ്ഞിരുന്നു.

മലയാളത്തിൽ ത്രില്ലർ സിനിമകൾക്ക് പുതിയൊരു ബെഞ്ച്മാർക്ക് നൽകിയ ചിത്രമായിരുന്നു മോഹൻലാൽ - ജീത്തുജോസഫ് കൂട്ടുകെട്ടിലൊരുങ്ങിയ 'ദൃശ്യം'. ജോർജ്കുട്ടിയും കുടുംബവും അവരുടെ നിലനിൽപ്പിനായുള്ള പോരാട്ടങ്ങളും മലയാളി പ്രേക്ഷകർ ഇരുകൈയ്യും നീട്ടി സ്വീകരിച്ചപ്പോൾ ഒരു രണ്ടാം ഭാഗവും സിനിമക്ക് ഉണ്ടായി. ഇന്ത്യയും കടന്ന് ചൈനീസും കൊറിയനും ഉൾപ്പടെ നിരവധി ഭാഷകളിലേക്ക് റീമേക്ക് ചെയ്യപ്പെട്ടിരുന്നു.

Content highlights: Jeethu joseph about fahadh faasil film